سڈنی: سی شیفرڈ کے مفرور بانی پاؤل واٹسن نے منگل کو جاپان پر الزام لگایا کہ وہ جرمنی اور کوسٹاریکا کے ساتھ مل کر اسے پکڑنے کی سازش کر رہا ہے تاکہ جاپان کے وہیل شکار میں رکاوٹ ڈالنے کا بدلہ لیا جا سکے۔
دو ماہ نظر بند رہ کر ضمانت اور جرمنی سے بھاگنے کے بعد اپنے اولین تبصروں میں عسکریت پسند ماحولیاتی کارکن نے کہا کہ برلن نے اس کے ساتھ دھوکا کیا چونکہ وہ ٹوکیو کے ساتھ اس کے تحویل مجرم کے مذاکرات کر رہا تھا۔
واٹسن، جس نے برسوں تک انٹارکٹکا میں جاپان کے وہیل شکار کو ہراساں کیا ہے، کو مئی میں جرمنی میں حراست میں لیا گیا تھا اور تحویل مجرم کے معاہدے کے تحت اسے کوسٹا ریکا کے حوالے کیا جانا تھا جہاں یہ 2002 میں شارک فن پر ہونے والے ایک سمندری جھگڑے میں مطلوب تھا۔
پچھلے ہفتے جاپان نے تصدیق کی تھی کہ اس نے برلن سے کہا تھا کہ واٹسن کو اس کے حوالے کر دیا جائے، جس کے چند ہی دن بعد 61 سالہ بحری تحفظ پسند ضمانت کروا کے بھاگ نکلا۔
سی شیفرڈ کی ویب سائٹ پر اپنے سپورٹران کو ایک پیغام میں واٹسن نے کہا کہ کوسٹا ریکا اور جرمنی “سی شیفرڈ کو خاموش کرنے کی جاپانی مہم میں اس کے چمچے” تھے، جو کئی برسوں سے بحر منجمد جنوبی میں ہارپون بردار جہازوں سے جھگڑا کرتا رہا ہے۔ “یہ انصاف کے لیے نہیں، بلکہ یہ بدلے کے لیے ہے،” اس نے کہا۔ یہ کبھی بھی کوسٹا ریکا کے بارے میں نہیں تھا۔ “تاہم میں نے انہیں ایک بار پھر چکمہ دے دیا ہے”۔
