ٹوکیو: اپوزیشن لیڈر شینزو ایبے، جو جاپان کے اگلے وزیر اعظم بننے کے اچھے امکانات کے حامل ہیں، نے بدھ کو ٹوکیو میں جنگی مزار کا دورہ کیا، ایک ایسی حرکت جو ہمسایہ ممالک کے ساتھ مزید ٹکراؤ کا سبب بن سکتی ہے۔
باضابطہ شام کے لباس میں ملبوس ایبے، جو کبھی جاپان کے وزیر اعظم تھے اور جنہیں پچھلے ماہ مرکزی اپوزیشن جماعت لبرل ڈیموکریٹک پارٹی (ایل ڈی پی) کا صدر چنا گیا، نے کہا کہ وہ باضابطہ حیثیت میں یاسوکونی مزار پر گئے تھے۔
یہ شینتو مزار وسطی ٹوکیو میں جنگ میں ہلاک ہونے والے پچیس لاکھ افراد کو خراج تحسین پیش کرتا ہے، جن میں دوسری جنگ عظیم کے 14 صفِ اول کے جنگی مجرم بھی شامل ہیں۔
حکومتی وزراء کی جانب سے مزار کے دورے چین اور جزیرہ نما کوریا میں اشتعال پیدا کر دیتے ہیں، جہاں بہت سے لوگ یہ خیال کرتے ہیں کہ جاپان 20 ویں صدی کے پہلے نصف میں اپنے وحشیانہ جارحانہ پن کی تلافی کرنے میں ناکام رہا ہے۔
موجودہ وزیر اعظم یوشیکو نودا نے مزار کا دورہ نہیں کیا، اگرچہ ان کی کابینہ کے دو وزرا اگست میں وہاں گئے تھے۔
